નવી દિલ્હી : વર્ષની શરૂઆત સાથે જ ચાંદીના ભાવે એક ઐતિહાસિક રેકોર્ડ બનાવ્યો છે. જેમાં 19 જાન્યુઆરીએ એમસીએકસ પર ચાંદીનો ભાવ પહેલી વાર  રૂપિયા 3,00,000  પ્રતિ કિલોને પાર કરી ગયો.  ચાંદીનો ભાવ 3,04,000 રૂપિયા પ્રતિ કિલોની આસપાસ રહ્યો. જેના લીધે  ચાંદીના રોકાણકારોને બમ્પર વળતર મળ્યું છે. છેલ્લા એક  મહિનાની વાત કરીએ તો ચાંદીના ભાવમાં 1 લાખ રૂપિયાનો વધારો થયો છે. ગયા મહિને 19 ડિસેમ્બર 2025 ના રોજ એક કિલો ચાંદીનો ભાવ 2,03,500  રૂપિયા હતો. 

ચીનમાં ચાંદી પ્રીમિયમ ભાવે વેચાઈ રહી છે

ચાંદીના ભાવમાં વધારાનું મુખ્ય કારણ ચીન છે. ચીનમાં ચાંદી પ્રીમિયમ ભાવે વેચાઈ રહી છે. જેમાં આંતરરાષ્ટ્રીય ભાવ કરતાં વધુ ભાવે વેચાઈ રહી છે. એટલે કે સ્થાનિક માંગ પુરવઠા કરતાં વધી ગઈ છે. જેના લીધે  લંડન અને ન્યુ યોર્ક બજારોમાં પણ ભાવ વધે છે. તેમજ જ્યારે  ચીનમાં ઉત્પાદન વધે છે, ત્યારે ચાંદીની માંગમાં વધારો થાય છે. કારણ કે તે સૌર પેનલનો સૌથી મોટો ઉત્પાદક અને નિકાસકાર છે.  સૌર પેનલમાં ચાંદીનો ઉપયોગ થાય છે.

ચાંદીએ સોના કરતાં વધુ સારું વળતર પણ આપ્યું

ચાંદીના ભાવમાં વધારાના બીજા કારણોમાં વૈશ્વિક આર્થિક અનિશ્ચિતતા, ચલણ બજારની અસ્થિરતા અને રોકાણકારો દ્વારા સુરક્ષિત રોકાણના લીધે  શોધ ચાંદીની માંગને આગળ ધપાવી રહી છે. ચાંદીએ સોના કરતાં વધુ સારું વળતર પણ આપ્યું છે. આંતરરાષ્ટ્રીય બજારોમાં ચાંદીની માંગ સતત વધી રહી છે.  જ્યારે રોકાણ ઉપરાંત, ઇલેક્ટ્રોનિક્સ, સૌર પેનલ્સ, ઇવી (ઇલેક્ટ્રિક વાહનો) અને ઉદ્યોગમાં ચાંદીનો વ્યાપકપણે ઉપયોગ થાય છે અને અહીં માંગ પણ વધી રહી છે.

બુલિયન માર્કેટમાં ગ્રાહકોની સંખ્યામાં ઘટાડો

ચાંદીના ભાવમાં થયેલા અભૂતપૂર્વ વધારાનો પ્રભાવ બુલિયન માર્કેટમાં પણ જોવા મળી રહ્યો છે. ગ્રાહકોની સંખ્યામાં ઘટાડો થયો છે. પરંપરાગત દાગીના અને વસ્તુઓ માટે ભૌતિક ચાંદીની માંગમાં થોડો ઘટાડો થયો છે. જોકે, ડિજિટલ સોનાની માંગમાં વધારો થયો છે. ચાંદીના ETF માં રોકાણકારોનો રસ મજબૂત રહે છે.