મુંબઈઃ મીરા-ભાયંદર મેટ્રો સેવા આવતા મહિને કાર્યરત થશે, એમ મહારાષ્ટ્રના પરિવહન પ્રધાન પ્રતાપ સરનાઈકે જણાવ્યું હતું. આગામી મુંબઈ મેટ્રો લાઈન 9, જે લાઈન 7 નું એક મહત્વપૂર્ણ વિસ્તરણ છે, તે મુંબઈના દહિસર (પૂર્વ) ને થાણે જિલ્લાના મીરા-ભાયંદર સાથે જોડે છે. સરનાઈકે જણાવ્યું હતું કે મીરા-ભાયંદરના તમામ મુખ્ય રસ્તાઓનું આગામી દોઢથી બે વર્ષમાં કોંક્રીટીકરણ કરવામાં આવશે.

મીરા-ભાયંદર મ્યુનિસિપલ કોર્પોરેશન (MBMC) મુખ્યાલય ખાતે એક પત્રકાર પરિષદને સંબોધતા, સરનાઈકે જણાવ્યું હતું કે, મેટ્રો પ્રોજેક્ટનું કામ તેના અંતિમ તબક્કામાં છે. લોકો મેટ્રોની આતુરતાથી રાહ જોઈ રહ્યા છે. મેં મુખ્યપ્રધાન સાથે વાત કરી છે, અને અમે આવતા મહિને 5 ફેબ્રુઆરીએ સ્થાનિક સંસ્થા (ZP અને પંચાયત સમિતિ)ની ચૂંટણીઓ પછી મેટ્રો શરૂ કરીશું. 

તેમણે જણાવ્યું હતું કે મેટ્રો ટ્રાફિક ભીડમાં નોંધપાત્ર ઘટાડો કરશે અને જાહેર પરિવહનમાં સુધારો કરશે. પ્રધાને શહેરને સૂર્યા ડેમમાંથી પાણી મળવાનું શરૂ થવાની પણ જાહેરાત કરી હતી, જેનાથી લાંબા સમયથી ચાલી આવતી પાણીની સમસ્યાઓનો ઉકેલ આવે  તેવી અપેક્ષા છે.  

નાગરિક ચૂંટણીના પરિણામો પર ટિપ્પણી કરતા, સરનાઈકે કહ્યું કે તેઓ વડા પ્રધાન નરેન્દ્ર મોદીના નેતૃત્વમાં ભાજપની જીતથી સંતુષ્ટ છે. "લોકોએ તેમને  ટેકો આપ્યો છે. અમે વિકાસ પર કામ કર્યું, પરંતુ કદાચ લોકોએ અમારા પર સંપૂર્ણ વિશ્વાસ ન કર્યો. છતાં, અમારા મતોની સંખ્યામાં 1.90 લાખનો વધારો થયો છે," શિવસેનાના નેતાએ કહ્યું. તેમણે કહ્યું કે ચૂંટણી સમયગાળા દરમિયાન મરાઠી-બિન-મરાઠી વિવાદથી MNS અને શિવસેના (UBT)ને ફાયદો થયો.

ગયા જુલાઈમાં મહારાષ્ટ્ર નવનિર્માણ સેનાના કાર્યકરો દ્વારા મીરા ભાયંદરમાં એક દુકાનદાર પર થયેલા હુમલાથી પ્રાદેશિક ઓળખનો મુદ્દો ઉભો થયો હતો. મનસે અને અન્ય જૂથોએ મરાઠી ઓળખને મજબૂત બનાવવા માટે એક વિશાળ વિરોધ કૂચનું આયોજન કર્યું હતું.
પીટીઆઈ