(વાણિજ્ય પ્રતિનિધિ તરફથી)
મુંબઈઃ સ્થાનિક ફોરેક્સ માર્કેટમાં આજે ખાસ કરીને ધાતુના આયાતકારોની પ્રબળ માગ, સ્થાનિક ઈક્વિટી માર્કેટમાં નરમાઈ અને બે્રન્ટ ક્રૂડતેલના વાયદામાં ભાવ વધી આવ્યાના નિર્દેશો ઉપરાંત વૈશ્વિક સ્તરે ભૂરાજકીય સાથે આજે ડૉલર સામે રૂપિયો વધુ સાત પૈસાના ઘટાડા સાથે 90.97ના નવાં તળિયે બંધ રહ્યો હોવાનું ફોરેક્સ ટ્રેડરોએ જણાવ્યું હતું. જોકે, આજે ડૉલર ઈન્ડેક્સમાં સાધારણ નરમાઈનું વલણ રહ્યું હોવાથી રૂપિયાને થોડો ટેકો મળ્યો હતો. 

બજારનાં સાધનોના જણાવ્યાનુસાર આજે સ્થાનિકમાં ડૉલર સામે રૂપિયો ગઈકાલના 90.90ના બંધ સામે સાધારણ નરમાઈના અન્ડરટોને 90.91ની સપાટીએ ખૂલ્યા બાદ સત્ર દરમિયાન નીચામાં 91.06 અને ઉપરમાં 90.88ની રેન્જમાં અથડાઈને અંતે ગઈકાલના બંધ સામે સાત પૈસાના ઘટાડા સાથે 90.97ની સપાટીએ બંધ રહ્યો હતો. નોંધનીય બાબત એ છે કે આ પૂર્વે ગત 16મી ડિસેમ્બરના રોજ ડૉલર સામે રૂપિયો સત્ર દરમિયાન 91.14 સુધી ગબડ્યા બાદ અંતે 90.03ની ઐતિહાસિક નીચી સપાટીએ બંધ રહ્યો હતો. 

વૈશ્વિક સ્તરે ભૂરાજકીય તણાવ વધવાની સાથે વિશ્વ બજાર પાછળ ઈક્વિટી માર્કેટમાં નરમાઈ અને વિદેશી સંસ્થાકીય રોકાણકારોની અવિરત વેચવાલી રહેતાં ડૉલર સામે રૂપિયામાં નકારાત્મક વલણ જોવા મળ્યું હતું જોકે, આજે ડૉલર ઈન્ડેક્સમાં નરમાઈ અને રિઝર્વ બૅન્ક ઑફ ઈન્ડિયાનો સંભવિતપણે બજારમાં હસ્તક્ષેપ રહેતાં ઘટાડો મર્યાદિત રહ્યો હોવાનું મિરે એસેટ્ શૅરખાનના વિશ્લેષક અનુજ ચૌધરીએ જણાવતાં ઉમેર્યું હતું કે વૈશ્વિક અનિશ્ચિતતાઓને ધ્યાનમાં લેતા આગામી ટૂંકા સમયગાળા દરમિયાન ડૉલર સામે રૂપિયો 90.70થી 91.25 આસપાસની રેન્જમાં રહે તેવી શક્યતા નકારી ન શકાય. 

ડૉલર સામે રૂપિયોદરમિયાન આજે સ્થાનિકમાં બીએસઈ બૅન્ચમાર્ક સેન્સેક્સ અને એનએસઈ બૅન્ચમાર્ક નિફ્ટીમાં અનુક્રમે 1065.71 પૉઈન્ટનો અને 353 પૉઈન્ટનો ઘટાડો આવ્યો હતો. તેમ જ ગઈકાલે વિદેશી સંસ્થાકીય રોકાણકારોની ઈક્વિટીમાં રૂ. 3262.82 કરોડની ચોખ્ખી વેચવાલી રહી હોવાના નિર્દેશ ઉપરાંત બે્રન્ટ ક્રૂડતેલના વાયદામાં ભાવ ગઈકાલના બંધ સામે 0.09 ટકા વધીને બેરલદીઠ 63.94 ડૉલર આસપાસ ક્વૉટ થઈ રહ્યા હોવાથી રૂપિયો દબાણ હેઠળ રહ્યો હતો. તેમ છતાં ડૉલર ઈન્ડેક્સ ગઈકાલના બંધ સામે 0.91 ટકા ઘટીને 98.48 આસપાસ ક્વૉટ થઈ રહ્યો હોવાથી રૂપિયાને અમુક અંશે ટેકો મળ્યો હોવાનું સૂત્રોએ જણાવ્યું હતું.