હવામાન વિભાગના જણાવ્યા અનુસાર, રાજ્યમાં આગામી બે દિવસમાં લઘુતમ તાપમાનમાં 3 થી 5 ડિગ્રીનો વધારો થઈ શકે છે. ખાસ કરીને અમદાવાદ અને ગાંધીનગર જેવા શહેરોમાં લઘુતમ તાપમાન 15 થી 16 ડિગ્રી આસપાસ રહેવાની શક્યતા છે. જોકે, તાપમાન વધવા છતાં આગામી ત્રણ દિવસ સુધી રાજ્યમાં 'બેવડી ઋતુ' એટલે કે મિશ્ર હવામાનનો અનુભવ થશે. દિવસે ગરમી અને વહેલી સવારે તેમજ રાત્રે ઠંડીનો અહેસાસ નાગરિકોને પરેશાન કરી શકે છે.

સુપ્રીમ કોર્ટે UGCના નવા નિયમ પર બ્રેક લગાવી છે. નવા નિયમોનો દુરુપયોગ થવાની શક્યતા હોવાનું જણાવી સુપ્રીમ કોર્ટે તેમાં સુધારો કરવા સૂચન કર્યું હતું. આ કેસની આગામી સુનાવણી 19 માર્ચે થશે.

સંસદના સત્રની શરૂઆત પહેલા વડા પ્રધાન નરેન્દ્ર મોદીએ સંસદ ભવન પરિસરમાં મીડિયાને સંબોધિત કર્યા હતા. પીએમ મોદીએ કહ્યું કે, આપણી સરકારની ઓળખ રહી છે - રિફોર્મ, પર્ફોર્મ અને ટ્રાન્સફોર્મ. હવે અમે રિફોર્મ એક્સપ્રેસ પર ચાલી પડ્યા છીએ. પીએમ મોદીએ વધુમાં જણાવ્યું કે, સત્રના પ્રારંભમાં રાષ્ટ્રપતિએ સાંસદો પાસેથી જે અપેક્ષાઓ વ્યક્ત કરી છે, મને વિશ્વાસ છે કે સાંસદોએ તેને ગંભીરતાથી લીધી હશે. આ સત્ર અત્યંત મહત્વપૂર્ણ છે. 21મી સદીનો એક ક્વાર્ટર વીતી ચૂક્યો છે અને આ બીજા ક્વાર્ટરની શરૂઆત છે. 2047 વિકસિત ભારત' ના લક્ષ્યને પ્રાપ્ત કરવા માટેના મહત્વના 25 વર્ષોની શરૂઆત થઈ ચૂકી છે.

આજે શરૂઆતના વેપારમાં ભારતીય રૂપિયો અમેરિકન ડોલર સામે અત્યાર સુધીના સૌથી નીચલા સ્તરે પહોંચી ગયો હતો. એક ડોલર સામે રૂપિયાની કિંમત રૂ. 92.11 પૈસા થઈ હતી.

અજિત પવારની અંતિમ યાત્રા તેમના કાટેવાડી નિવાસસ્થાનથી શરૂ થઈ ગઈ છે, અને તેમને સંપૂર્ણ રાજ્ય સન્માન સાથે અંતિમ વિદાય આપવામાં આવી રહી છે. તેમની અંતિમ યાત્રા લગભગ 6 કિલોમીટરનું અંતર કાપ્યા પછી સ્મશાનભૂમિ પહોંચશે.

ગીર સોમનાથમાં ઉના-ભાવનગર રોડ પર આવેલા ગાંગડા ગામમાં એક મકાનની ઓસરીમાં સુતેલા પિતા ઉપર દીપડાએ હુમલો કર્યો હતો.  પિતા પર હુમલો થતો જોઈ પુત્ર ત્યાં દોડી આવ્યો હોત. જેથી દીપડાએ તેના પર પણ હુમલો કર્યો હતો એટલે પિતાએ દાતરડાંથી દીપડા પર પલટવાર કર્યો અને તેને ત્યાં જ મારી નાખ્યો હતો. વન વિભાગની ટીમે ઘટનાસ્થળે પહોંચી પિતા-પુત્ર બંનેને સારવાર માટે ઉના ખસેડ્યા હતા.

કેન્દ્રીય ગૃહ પ્રધાન અમિત શાહ આજે અજિત પવારના સંસ્કારમાં સામેલ થશે. સવારે 11 કલાકે અજિત પવારના પૈતૃક ગામ કાટેવાડી ખાતે રાજકીય સન્માન સાથે તેમના અંતિમ સંસ્કાર કરવામાં આવશે. દુર્ઘટનાની ફોરેન્સિક તપાસ માટે એએઆઈબીની ટીમ સ્થળ પર પહોંચી ગઈ છે.

આજે સવારે 11 કલાકે અજિત પવારના પૈતૃક ગામ કાટેવાડી ખાતે રાજકીય સન્માન સાથે તેમના અંતિમ સંસ્કાર કરવામાં આવશે. ગામમાં અજિત પવારના હજારો સમર્થકો ઉમટી પડ્યા છે. કોઈ અનિચ્છનીય ઘટના ન બને તે માટે સુરક્ષાનો ચાંપતો બંદોબસ્ત ગોઠવવામાં આવ્યો છે.