(અમારા પ્રતિનિધિ તરફથી)
સુરતઃ  એક મહિલા સહિત એક પરિવારના ત્રણ સભ્યએ ફોરેક્સ ટ્રેડિંગ દ્વારા ઊંચા વળતરનું વચન આપીને ઓછામાં ઓછા ૧૪ લોકો સાથે રૂ. ૨.૦૫ કરોડની છેતરપિંડી કરી હોવાનો આરોપ છે. પોલીસના જણાવ્યા અનુસાર આરોપીઓએ નિયમિતપણે મંદિરમાં જઈ, પોતે સમૃદ્ધ હોય તેવો ડોળ કરી લોકોનો વિશ્વાસ જીત્યો હતો. દાભોલી ખાતેના એક મંદિરમાં રોજ જવાનું અને પ્રસાદ તરીકે કાજૂ-બદામ જેવો સૂકો મેવો વેચી પોતે  શ્રીમંત હોવાનું લોકોના મનમાં ઠસાવી દીધું હતું. 

બાદમાં આ ત્રણેયે વરાછામાં તેમની કંપની, એપિક ઇનોવેશન એલએલપીના લોન્ચ માટે લોકોને આમંત્રણ આપ્યું, અને દાવો કર્યો કે તે ફોરેક્સ ટ્રેડિંગમાં રોકાયેલી છે. કંપનીમાં કથિત રીતે ચાર ભાગીદારો હતા, જેમના નામ  અશોક સોલંકી, તેનો પુત્ર જય, પુત્રી જ્યોતિ અને રૂષિ પટેલ  હોવાનું જાણવા મળ્યું હતું.  તેમણે રોકાણકારોને માસિક 4-5% વળતર આપવાનું વચન આપ્યું હતું.

એક ફરિયાદી, અનિલ બલાર (50), એક ઓનલાઈન એપેરલ વેપારી, એ જણાવ્યું હતું કે પરિવારના દાવાઓથી ખાતરી થયા પછી તેણે એપ્રિલ 2024 માં ₹35 લાખનું રોકાણ કર્યું હતું. વિશ્વાસ જાળવી રાખવા માટે, આરોપીએ શરૂઆતમાં નાના વળતર આપ્યા, જેમાં મે અને જૂનમાં ₹56,666 અને ₹60,000નો સમાવેશ થાય છે, ત્યારબાદના મહિનાઓમાં ફરી થોડી રકમ ચૂકવવામાં આવી હતી. 

જોકે, સપ્ટેમ્બર 2024 પછી, ચૂકવણી બંધ થઈ ગઈ અને ઓફિસ પણ બંધ થઈ ગઈ, અને આરોપીઓ કથિત રીતે શહેર છોડીને ભાગી ગયા હતા.  બીજી બાજુ આ વાત બહાર આવતા અન્ય છેતરાયેલા રોકાણકારો પણ ફરિયાદ નોંધાવતા ગયા અને આખો ફ્રોડનો કેસ બહાર આવ્યો હતો. 

થોડા સમય બાદ રોકાણકારોની એક બેઠક મુકેશ પટેલના ઘરે યોજાઈ હતી,  જ્યાં ચોથા ભાગીદાર, રૂષિ પટેલે અહેવાલ મુજબ તેમને ખાતરી આપી કે પૈસા ચૂકવવામાં આવશે. જોકે, કોઈ રિફંડ આપવામાં આવ્યું ન હતું.
સુરત પોલીસની આર્થિક ગુના શાખાએ આરોપી અશોક, જય અને જ્યોતિની ધરપકડ કરી છે, જ્યારે રૂષિ પટેલ હજુ પણ ફરાર છે, તેવી માહિતી સૂત્રોએ આપી હતી.