નવી દિલ્હીઃ દેશભરમાં 1,825 કરોડ રૂપિયાના ગુડ્સ એન્ડ સર્વિસ ટેક્સ (જીએસટી) રિફંડ કૌભાંડ પાછળના માસ્ટરમાઈન્ડ કપિલ ચુગની ધરપકડ કરવામાં આવી છે. અમદાવાદની જીએસટી ઇન્ટેલિજન્સ ડિરેક્ટોરેટ જનરલ (ડીજીજીઆઈ)ની એક ટીમે 19 એપ્રિલ, 2026ના રોજ દિલ્હીના ઇન્દિરા ગાંધી ઇન્ટરનેશનલ એરપોર્ટ પરથી તેની ધરપકડ કરી હતી. તે લાંબા સમય પછી દુબઈથી ભારત પરત ફરી રહ્યો હતો. આ બાબત અંગે નાણા મંત્રાલયે એક સત્તાવાર નિવેદનમાં આ જાણકારી આપી હતી.

તપાસમાં ખુલાસો થયો છે કે કપિલ ચુગ અને તેના સાથી વિપિન શર્માએ નકલી ઈનપુટ ટેક્સ ક્રેડિટ મેળવવા અને ઝીરો રેટેડ સપ્લાયના નામ પર રિફંડ મેળવવા માટે એક સુનિયોજિત અને જટિલ નેટવર્ક તૈયાર કર્યું હતું. કપિલ આ સમગ્ર યોજના પાછળનો મુખ્ય સૂત્રધાર છે અને એક રીઢો ગુનેગાર છે. તેણે આ સમગ્ર સિન્ડિકેટને ડમી કંપનીઓ, કર્મચારીઓ અને સહયોગીઓ મારફતે ચલાવતો હતો.

કપિલ તપાસથી બચતો રહ્યો હતો. તે ડીજીજીઆઈ અમદાવાદ તરફથી પાઠવવામાં આવેલા સમન્સ (કુલ 22)નો જવાબ આપી રહ્યો નહોતો. તે તપાસમાં સહયોગ આપી રહ્યો નહોતો. મંત્રાલયના જણાવ્યા મુજબ, તે આશરે 1,825 કરોડની જીએસટી રિફંડ છેતરપિંડી કર્યા પછી દુબઈ ભાગી ગયો હતો. 

આ સંસ્થાઓ ઉધાર લીધેલા કેવાયસી દસ્તાવેજોનો ઉપયોગ કરીને બનાવવામાં આવી હતી અને જાહેર કરાયેલા પરિસરમાં માળખાકીય સુવિધાઓ, કર્મચારીઓ અને વાસ્તવિક વ્યવસાયિક પ્રવૃત્તિનો અભાવ હોવાનું જણાયું હતું. 

ડમી માલિકો/ડિરેક્ટરો ફક્ત નામ પૂરતા ધિરાણકર્તા હતા અને તેમને નિશ્ચિત માસિક રોકડ ચૂકવવામાં આવી રહી હતી. જીએસટી રજિસ્ટ્રેશન, ઇન્વોઇસ જનરેટિંગ, બેન્કિંગ કામગીરી, રિટર્ન ફાઇલિંગ અને રિફંડ ક્લેમ સબમિટ કરવા સહિતની તમામ કામગીરી માસ્ટરમાઇન્ડ્સ દ્વારા હાથ ધરવામાં આવતી હતી.