ગંગટોક: પહાડી રાજ્ય સિક્કિમમાં અવિરત પડી રહેલા મુસળધાર વરસાદને લીધે જનજીવન અસ્તવ્યસ્ત થઈ ગયું છે. કુદરતના પ્રકોપ વચ્ચે રાજ્યના અનેક વિસ્તારોમાં ભયાનક ભૂસ્ખલન (Landslides) ની નવી ઘટનાઓ સામે આવી છે. ખાસ કરીને સિલિગુડી અને સિક્કિમ વચ્ચેની 'લાઈફલાઈન' ગણાતા નેશનલ હાઈવે-10 (NH-10) પર 20 માઈલ ક્ષેત્રમાં પહાડનો મોટો હિસ્સો ધસી પડતાં વાહનવ્યવહાર સંપૂર્ણપણે ખોરવાઈ ગયો છે.
હાઈવે પર કાટમાળ આવતા પ્રવાસીઓ હેરાન-પરેશાન
ગુરુવારની વહેલી સવારથી જ પહાડોની ઢાળ પરથી મોટા પથ્થરો અને માટી નીચે ખાબકી રહ્યા છે, જેના કારણે 20 માઈલ વિસ્તાર અત્યંત જોખમી બની ગયો છે. સિંગતામ-રંગપો માર્ગ પર પણ ભૂસ્ખલનને કારણે રસ્તા પર કાદવ-કીચડ અને પથ્થરોના ઢગલા ખડકાઈ ગયા છે. આ પરિસ્થિતિના કારણે સામાન્ય મુસાફરો ઉપરાંત સિક્કિમની મુલાકાતે આવેલા સેંકડો પ્રવાસીઓ રસ્તામાં જ અટવાઈ પડ્યા છે. માર્ગોની ગંભીર સ્થિતિને ધ્યાનમાં રાખીને સિક્કિમ પ્રશાસને ઈમરજન્સી એડવાઈઝરી જારી કરી છે અને પ્રવાસીઓ તેમજ સ્થાનિક લોકોને ભૂસ્ખલન પ્રભાવિત વિસ્તારો તરફ જવાનું ટાળવા અપીલ કરી છે.
પશ્ચિમ સિક્કિમમાં ખેચુપેરી-ગ્યાલશિંગ રૂટ ખોરવાયો
પહાડી ઢોળાવો અસ્થિર હોવાથી અને સતત કાટમાળ પડતો હોવાના કારણે ગુરુવારે સવારથી જ રિમબી-યુક્સમ (Rimbi-Yuksom) રોડ વાહનવ્યવહાર માટે બંધ કરી દેવાયો છે. રિમબી થઈને ખેચુપેરીથી ગ્યાલશિંગ જતો રસ્તો પણ અનેક જગ્યાએ પથ્થરો ધસી પડવાને કારણે અવરોધાયો છે. આ સાથે માઈલ-બારડાંગ માર્ગ પર ભારે વરસાદ અને પાણી ભરાવાને કારણે વાહનોની અવરજવર મુશ્કેલ બની ગઈ છે.
સિક્કિમના યુક્સોમ-તાશિદિંગ વિસ્તારમાં આવેલ રિમ્બી ગામમાં સતત વરસાદને કારણે ભૂસ્ખલન થયું, અત્યાર સુધી કોઈ જાનહાનિના અહેવાલ નથી.#Sikkim #landslide pic.twitter.com/uh7nPTl7CM
— Vimal Prajapati GJ (@mgvimal_12) September 25, 2026
તીસ્તા નદીમાં ઘોડાપૂરનું જોખમ હોવાથી એલર્ટ જાહેર
ઉપરી પહાડી વિસ્તારોમાં સતત થઈ રહેલી મેઘમહેરને કારણે સિક્કિમની મુખ્ય નદી તીસ્તા (Teesta River) અને તેની સહાયક નદીઓની જળસપાટીમાં ચિંતાજનક વધારો નોંધાયો છે. નદીઓનો પ્રવાહ ઝડપથી વધી રહ્યો હોવાથી વહીવટીતંત્રે નીચાણવાળા તટવર્તી વિસ્તારોમાં હાઈ એલર્ટ જાહેર કર્યું છે. બીજી તરફ, માર્ગ મકાન વિભાગ અને ડિઝાસ્ટર મેનેજમેન્ટની ટીમો જેસીબી (JCB) મશીનો વડે હાઈવે પરથી કાટમાળ હટાવીને રસ્તાઓ વહેલી તકે ખુલ્લા કરવાના યુદ્ધના ધોરણે પ્રયાસો કરી રહી છે.
