મુંબઈઃ વીજળીનું બિલ ભર્યું હોવા છતાં જો તમારા ઘરની વીજ લાઈન કાપી નાખવામાં આવે તો તમે શું કરશો? બોલિવૂડ અભિનેત્રી તનિષા મુખર્જી સાથે આવો જ કિસ્સો બન્યો હોવાનો દાવો તેણે કર્યો છે. લોનાવલામાં આવેલા પોતાના પૈતૃક ઘરનું વીજ-કનેક્શન કાપી નાખવામાં આવતા તનિષાએ સોશિયલ મીડિયા પર મહારાષ્ટ્ર સ્ટેટ ઈલેક્ટ્રિસિટી ડિસ્ટ્રિબ્યુશન બોર્ડ(એમએસઈડીસીએલ)ની કામગીરી સામે સવાલ ઉઠાવ્યા છે. તનીષાનો દાવો છે કે તેમણે બિલની રકમ ચૂકવી દીધી હોવા છતાં નિયત મુદત પૂર્ણ થતા પૂર્વે જ તેના ઘરની વીજળી અધિકારીઓ કાપી ગયા હતા.
તનિષા મુખર્જીએ સોશિયલ મીડિયા પ્લેટફોર્મ X પર લોનાવલાના પોતાના ઘરની વીજળી કાપી નાખવામાં આવ્યાને લઈને મહારાષ્ટ્ર સ્ટેટ ઇલેક્ટ્રિસિટી બોર્ડ (MSEB) સામે નારાજગી વ્યક્ત કરી છે. તનિષાના દાવા મુજબ, ભારે વીજળીનું બિલ મોકલવામાં આવ્યું હતું અને બિલની છેલ્લી તારીખ પહેલાં જ વીજળી કાપી નાખવામાં આવી. તેમણે આરોપ લગાવ્યો કે વીજળી કાપીને લોકોને બિલ ભરવા માટે દબાણ કરવામાં આવી રહ્યું છે.
પોતાની પોસ્ટમાં તનીષાએ લોનાવલામાં એમએસઈબીની કામગીરીને “માફિયા” જેવી ગણાવી અને આક્ષેપ કર્યો કે નિયમોની અવગણના કરીને મનમાની કરવામાં આવી રહી છે. તેમણે મહારાષ્ટ્રના મુખ્ય પ્રધાન દેવેન્દ્ર ફડણવીસ, અમિત શાહ સહિત સંબંધિત અધિકારીઓને ટેગ કરીને આ મામલે હસ્તક્ષેપ કરવાની અપીલ કરી હતી. જોકે, તનીષાના આક્ષેપો અંગે વીજળી વિભાગનો વિગતવાર પ્રતિભાવ આ અહેવાલોમાં સામે આવ્યો નથી.
Maharashtra state electricity board in lonavala are behaving like mafia ! They are giving huge bills and forcing payment by cutting off electricity. This is just criminal! Coming on a Saturday evening to cut off the electricity even if it is before the due date and just holding…
— Tanishaa S Mukerji (@TanishaaMukerji) September 29, 2026
તનિષાએ સોશિયલ મીડિયા પોસ્ટમાં જણાવ્યું કે લોનાવલામાં તેમનું પૈતૃક ઘર આવેલું છે. અને પરિવાર સાથેની તેની મોટા ભાગની યાદો આજ ઘરથી જોડાયેલી છે. અને બાળપણનો મોટો સમય આ જ ઘરમાં પસાર કર્યો છે.
તેમણે આ પ્રોપર્ટી તેની મૂળ ઓળખ જળવાઈ રહે તે રીતે સાચવવાનો પ્રયાસ કર્યો હોવાનું પણ જણાવ્યું હતું. વીજળી કાપવાની ઘટનાને લઈને તેમણે સંબંધિત અધિકારીઓ પાસે હસ્તક્ષેપની માંગ કરી અને પોતાની ફરિયાદને ગંભીરતાથી લેવામાં આવે તેવી અપીલ કરી હતી.
રિપોર્ટ મુજબ તનિષાએ વીજ પુરવઠો કાપવાના નિર્ણય સામે સવાલ ઉઠાવતા કહ્યું કે આટલી મોટી રકમનું બિલ કેવી રીતે ચૂકવવું તે પણ સમજવું જરૂરી છે. તેમણે વીજળી વિતરણ વ્યવસ્થામાં જવાબદારી અને પારદર્શિતા અંગે પ્રશ્નો ઉઠાવ્યા છે. આ મુદ્દે તેમણે મહારાષ્ટ્રના મુખ્ય પ્રધાન દેવેન્દ્ર ફડણવીસ સહિત સંબંધિત લોકોનું ધ્યાન દોરવાનો પ્રયાસ કર્યો છે.
તનિષાની ફરિયાદ બાદ આ મામલો સોશિયલ મીડિયા પર ચર્ચામાં આવ્યો છે. કેટલાક યુઝર્સે પણ વીજળીના બિલ અને પુરવઠા સંબંધિત પોતાના અનુભવો શેર કર્યા છે. જોકે, તનિષા દ્વારા કરવામાં આવેલા આક્ષેપો અંગે વીજ વિતરણ કંપની તરફથી આ અહેવાલોમાં કોઈ વિગતવાર સત્તાવાર સ્પષ્ટતા સામે આવી નથી, તેથી હાલ આ મામલે તનીષાના દાવા અને કંપનીનું સત્તાવાર વલણ અલગથી જોવાનું રહેશે.
