નિશીનઃ એશિયન ગેમ્સની ટી-20 ટૂર્નામેન્ટ માટે ભારતે શ્રેયસ ઐયરના સુકાનમાં મજબૂત ટીમ જાપાન મોકલી હતી, જ્યારે પાકિસ્તાન ક્રિકેટ બોર્ડે પોતાના દેશમાં ક્રિકેટ સંબંધમાં ચાલતા રાજકારણ અને ખરાબ વ્યવહારને પગલે બાબર આઝમ, મોહમ્મદ રિઝવાન વગેરે મુખ્ય ખેલાડીઓ વિનાની ટીમ મોકલી હતી અને છેવટે તેમણે શનિવારે ફાઇનલમાં ભારત (India) સામે પરાસ્ત થવું પડ્યું ત્યાર બાદ સોશ્યલ મીડિયામાં ભારતીય ટીમ વિશે થતી ટકોરનો વિકેટકીપર-બૅટ્સમૅન સંજુ સૅમસને વળતો જવાબ આપ્યો છે.

સમાચાર સંસ્થા પીટીઆઇના અહેવાલ અનુસાર સૅમસન (Samson)એ નિવેદનમાં જણાવ્યું છે, `અમારી પાસે ખૂબ અનુભવી ટીમ હતી. અનુભવી ખેલાડીઓનો અનુભવ જ કામ આવતો હોય છે. પોતાની ઊર્જાને કેવી રીતે સંભાળવી એ અમે બહુ સારી રીતે જાણતા હતા. અમને સુવર્ણચંદ્રક કંઈ તાસક પર ભેટ નથી મળ્યો. એ માટે અમે ખૂબ મહેનત કરી છે જેને લીધે અમે શાનદાર જીત મેળવી શક્યા અને એ હાંસલ કરીને અમે બધા ખૂબ ખુશ છીએ. અમે દેશની મુખ્ય ટી-20 ટીમને આ ટૂર્નામેન્ટમાં લાવ્યા એનો અમને ઘણો ફાયદો થયો. પાકિસ્તાન સામેની ફાઇનલમાં અમને અમારી ટીમનો પ્રભાવ જોવા મળ્યો અને ફાઇનલનો અંત રોમાંચક રહ્યો.'

સંજુ સૅમસન એશિયન ગેમ્સમાં સારું નહોતો રમી શક્યો, પરંતુ વિકેટકીપર-બૅટ્સમૅન તરીકે ટીમમાં તેની હાજરી અગત્યની તો છે જ. વેસ્ટ ઇન્ડિઝ સામે છઠ્ઠી ઑક્ટોબરે (મંગળવારે) શરૂ થનારી પાંચ મૅચની ટી-20 સિરીઝ માટેની ટીમમાં પણ તેનો સમાવેશ છે. જોકે ઇશાન કિશન પણ ટીમમાં છે એટલે પ્લેઇંગ-ઇલેવનમાં જગ્યા મેળવવા બન્ને વચ્ચે હરીફાઈ જોવા મળી શકે.

શનિવારની ફાઇનલમાં ભારતે અભિષેક શર્માના 61 રન અને તિલક વર્માના અણનમ 51 રનની મદદથી છ વિકેટે 211 રન બનાવ્યા હતા. શરૂઆતમાં ભારતે 51 રનમાં બે વિકેટ ગુમાવી ત્યારે એવું લાગતું હતું કે ભારત મર્યાદિત સ્કોર કરશે તો પાકિસ્તાન જીતી જશે. જોકે પાકિસ્તાને 212 રનના લક્ષ્યાંક સામે એકમાત્ર હસન નવાઝ (96 રન)ની લડતને લીધે છ વિકેટે 192 રન બનાવ્યા અને પાકિસ્તાનનો 19 રનથી પરાજય થયો હતો. અક્ષર, વૉશિંગ્ટન સુંદર અને શિવમ દુબેએ બે-બે વિકેટ લીધી હતી.