ઓડિશાના બાલાસોર જિલ્લાના ભોગરાઈ બ્લોક સ્થિત બિચિત્રપુરના જંગલ વિસ્તારમાંથી અતિ દુર્લભ ગણાતા ઓરાંગુટાન (Orangutans)ના બચ્ચા શંકાસ્પદ સ્થિતિમાં મળી આવતાં પર્યાવરણવિદો અને વન્યજીવ નિષ્ણાતો આશ્ચર્યચકિત થઈ ગયા છે. ઓરાંગુટાન કુદરતી રીતે ભારતીય ઉપખંડમાં જોવા મળતા નથી અને તેમનું મૂળ પ્રાકૃતિક નિવાસસ્થાન અગ્નિ એશિયા (સાઉથ ઈસ્ટ એશિયા) ના દેશો જેવા કે મલેશિયા અને ઇન્ડોનેશિયાના બોર્નિયો તથા સુમાત્રા ટાપુઓ પર છે.

આશરે 4000 કિલોમીટર દૂરથી આ વિદેશી જીવો ભારત કેવી રીતે પહોંચ્યા અને બાલાસોરના દરિયાકાંઠા નજીકના જંગલમાં તેમને કેમ છોડી દેવામાં આવ્યા, તે રહસ્ય ઉકેલવા વન વિભાગ, સ્પેશિયલ ટાસ્ક ફોર્સ અને વાઈલ્ડલાઈફ ક્રાઈમ કંટ્રોલ બ્યુરોએ સંયુક્ત તપાસ શરૂ કરી છે.

ઓરાંગુટાન ભારત માટે કેમ આટલા વિશિષ્ટ અને અસામાન્ય છે?

ભારતના કોઈપણ જંગલમાં ઓરાંગુટાન પ્રાકૃતિક રીતે જન્મતા કે વસવાટ કરતા નથી. ભારતીય જંગલોમાં માત્ર 'હુલોક ગિબન' નામક વાનર પ્રજાતિ જ જોવા મળે છે. ઓરાંગુટાન માત્ર દક્ષિણ-પૂર્વ એશિયાના ઉષ્ણકટિબંધીય વરસાદી જંગલો (Tropical Rainforests)માં જ ઊંચા વૃક્ષો પર જીવન વિતાવે છે. ઈન્ટરનેશનલ યુનિયન ફોર કન્ઝર્વેશન ઓફ નેચર (IUCN) ની રેડ લિસ્ટ અનુસાર ઓરાંગુટાન અતિ સંવેદનશીલ અને સંરક્ષિત શ્રેણીમાં આવે છે, જેના આંતરરાષ્ટ્રીય વેપાર પર સંપૂર્ણ પ્રતિબંધ છે.

બાલાસોરના જંગલમાં કેવી રીતે પહોંચ્યા આ પાંચ બચ્ચા?:

રેસ્ક્યુ કરાયેલા પાંચ ઓરાંગુટાન પૈકી ત્રણ નર અને બે માદા છે, જેમની ઉંમર માત્ર છ મહિનાથી એક  વર્ષની આસપાસ હોવાનું સામે આવ્યું છે. અધિકારીઓને શંકા છે કે મલેશિયા કે ઇન્ડોનેશિયાથી શિપિંગ કન્ટેનર કે સમુદ્રી રૂટ મારફતે કોલકાતા બંદરે લાવવામાં આવ્યા હોઈ શકે છે. 

રોડ માર્ગે (નેશનલ હાઈવે-16) અન્ય સ્થળે લઈ જતી વખતે ચેકિંગના ડરથી બાલાસોર નજીકના જંગલમાં છોડી દેવાયા હોવાનું અનુમાન છે. જંગલ નજીકના માર્ગ પરથી પસાર થયેલી એક શંકાસ્પદ બ્લેક એસયુવી (SUV)ના સીસીટીવી ફૂટેજના આધારે તપાસ એજન્સીઓ આગળની કડીઓ શોધી રહી છે.

એક્ઝોટિક વાઈલ્ડલાઈફ સ્મગલિંગ અને બ્લેક માર્કેટ:

ગેરકાયદે પેટ માર્કેટમાં ઓરાંગુટાનના બચ્ચાંની ઊંચી કિંમત બોલાય છે. અમીર શોખીનો પોતાના પ્રાઈવેટ ફાર્મહાઉસ કે ઝૂમાં રાખવા માટે ગેરકાયદેસર રીતે આવા પ્રાણીઓ ખરીદતા હોય છે. તમામ પાંચેય ઓરાંગુટાનને ભુવનેશ્વરના સુપ્રસિદ્ધ 'નંદનકાનન ઝૂઓલોજિકલ પાર્ક' ખાતે ખસેડવામાં આવ્યા છે, જ્યાં નિષ્ણાત તબીબો દ્વારા તેમને ખાસ આહાર અને સારવાર હેઠળ સુરક્ષિત રાખવામાં આવ્યા છે.