હૈદરાબાદ: હૈદરાબાદમાં નવરાત્રી દરમિયાન દાંડિયા કાર્યક્રમોમાંથી મુસ્લિમ બાઉન્સરોને બાકાત રાખવાનો મુદ્દો ચર્ચાનો વિષય બન્યો છે. જે મુદ્દે હવે રાજકારણ પણ ગરમાયું છે. જેમાં એક તરફ AIMIM ના વડા અસદુદ્દીન ઓવૈસીએ આ મામલે નિવેદન આપ્યું છે. તો બીજી તરફ ગોશામહલના ધારાસભ્ય અને હિન્દુત્વવાદી નેતા ટી. રાજા સિંહે પણ આ અંગે આકરી પ્રતિક્રિયા આપી છે. ઉલ્લેખનીય છે કે હૈદરાબાદમાં મુસ્લિમ બાઉન્સરોએ આ દાંડિયા કાર્યક્રમોમાં ભેદભાવ અને રોજગારીની તકોના અભાવનો આરોપ લગાવ્યો છે.
તેલંગાણાના લોકોએ ધાર્મિક ભેદભાવથી ઉપર ઉઠવું જોઇએ
અસદુદ્દીન ઓવૈસીએ X હેન્ડલ પરની એક પોસ્ટમાં જણાવ્યું હતું કે, "મુસ્લિમ બાઉન્સર્સ અને અન્ય કર્મચારીઓએ જાણ કરી છે કે કટ્ટરપંથી સંગઠનોના દબાણને કારણે કાર્યક્રમના આયોજકો તેમનો બહિષ્કાર કરી રહ્યા છે. જો પોલીસ કડક કાર્યવાહી કરશે તો જ તેની ડામી શકાય છે. તેનાથી પણ મહત્વની વાત એ છે કે, તેલંગાણાના લોકોએ ધાર્મિક ભેદભાવથી ઉપર ઉઠીને આ અનિષ્ટ સામે એક થવું જોઈએ નહિતર રાજ્યની પ્રગતિ અને વિકાસ તેનો ભોગ બનશે.
Muslim bouncers and other workers have reported that event organisers are boycotting them under pressure from extremist organisations. This poison can be curbed if the police take strict action. More importantly, the people of Telangana must stand united across religions against this evil. Otherwise, the state’s progress and development will also become a victim.
— Asaduddin Owaisi (@asadowaisi) October 6, 2026
એમ.ડી. ફિરોઝ નામના બાઉન્સરે ગંભીર ચિંતા વ્યક્ત કરી હતી
ઓવૈસીએ મીડિયા અહેવાલોના જવાબમાં આ ટિપ્પણીઓ કરી હતી. ખાસ કરીને, એમ.ડી. ફિરોઝ (ફઝલ) નામના એક વ્યાવસાયિક બાઉન્સરે સાંપ્રદાયિક માનસિકતા ધરાવતા લોકો દ્વારા ચલાવવામાં આવી રહેલા કથિત અભિયાન અંગે ગંભીર ચિંતા વ્યક્ત કરી હતી. આ અભિયાનનો ઉદ્દેશ્ય દાંડિયા કાર્યક્રમોમાં લાઇટિંગ, ડેકોરેશન, ડીજે અને સાઉન્ડ-સિસ્ટમ સેવાઓ સાથે સંકળાયેલા મુસ્લિમ બાઉન્સર્સ અને કર્મચારીઓનો બહિષ્કાર કરવાનો હતો.
ગરબા અને દાંડિયા કાર્યક્રમોના આયોજકોએ પહેલને સમર્થન આપ્યું
જ્યારે બીજી તરફ હિંદુત્વવાદી નેતા ટી. રાજા સિંહે કહ્યું, તેલંગાણામાં નવરાત્રિના શુભ અવસર પર દાંડિયા અને ગરબાના ઉત્સવો ખૂબ જ ઉત્સાહપૂર્વક ઉજવવામાં આવે છે. છેલ્લા ચાર-પાંચ વર્ષથી અમે હિંદુ તહેવારોમાં બિન-હિંદુ બાઉન્સરોનો બહિષ્કાર કરવા માટે અભિયાન ચલાવી રહ્યા છીએ. ગરબા અને દાંડિયા કાર્યક્રમોના આયોજકોએ પણ આ પહેલને સમર્થન આપ્યું છે. અમે એ સુનિશ્ચિત કરવા માંગીએ છીએ કે કોઈ પણ હિંદુ યુવતી 'લવ જેહાદ'નો શિકાર ન બને કારણ કે ઘણીવાર આ બાઉન્સરો જ બિન-હિંદુઓને દાંડિયા અને ગરબાની ઉજવણીમાં પ્રવેશવામાં મદદ કરતા હોય છે. પરિણામે, છેલ્લા ચાર-પાંચ વર્ષોમાં તેલંગાણામાં આ મુદ્દા અંગે જાગૃતિ વધી છે.
હિંદુ તહેવારોમાં મુસ્લિમ બાઉન્સરોનું શું કામ
તેમણે ઓવૈસી પર નિશાન સાધતા કહ્યું, આજે મેં અસદુદ્દીન ઓવૈસીનું એક ટ્વીટ જોયું. તેઓ મુસ્લિમ બાઉન્સરોના સમર્થનમાં ટ્વીટ કરી રહ્યા છે. હું ઓવૈસીને પૂછવા માંગુ છું કે હિંદુ તહેવારોમાં મુસ્લિમોનું શું કામ છે? શું હવે તમે નક્કી કરશો કે ગરબા અને દાંડિયા જેવા હિંદુ તહેવારોમાં હિંદુ બાઉન્સર હોવા જોઈએ કે મુસ્લિમ બાઉન્સર?"
