જયપુરઃ 2022ના ચૅમ્પિયન ગુજરાત ટાઇટન્સે શનિવારે અહીં યજમાન રાજસ્થાન રૉયલ્સ (RR)ની ટીમ પર જડબેસલાક વર્ચસ્વ જમાવીને એને 77 રનથી હરાવ્યું ત્યાર બાદ ગુજરાતના કૅપ્ટન શુભમન ગિલે (Gill) ડ્રેસિંગ-રૂમમાં ઉજવણી કર્યા પછી સોશ્યલ મીડિયામાં પણ સેલિબ્રેશન કર્યું હતું જેમાં તેણે રાજસ્થાની શબ્દો `ખમ્મા ઘણી' (KHAMMA GHANI) લખીને ક્રિકેટપ્રેમીઓને આશ્ચર્યમાં મૂકી દીધા હતા.
શુભમન ગિલે એ મૅચમાં 44 બૉલમાં 84 રન કર્યા હતા. જોકે પછીથી ગુજરાતના જ સ્પિનર રાશીદ ખાને 33 રનમાં ચાર વિકેટ લીધી હતી અને રાજસ્થાનને 230 રનના લક્ષ્યાંકથી ખૂબ દૂર રાખ્યું હતું અને મૅન ઑફ ધ મૅચનો પુરસ્કાર જીતી લીધો હતો. ગુજરાતના વિજય બાદ થોડી જ વાર પછી શુભમન ગિલ અને રાશીદ ખાનવાળો ફોટો મીડિયામાં વાઇરલ થયો હતો. એમાં ગિલ અને રાશીદ `ફિંગર્સ ઇન ઇયર્સ' સેલિબે્રશનમાં જોવા મળ્યા હતા.
જયપુર `પિન્ક સિટી' તરીકે જાણીતું છે અને એમાં ડાર્ક બ્લૂ રંગના ડ્રેસમાં સજ્જ ગુજરાત ટાઇટન્સના ખેલાડીઓએ વિજય મેળવ્યો હતો. શુભમન ગિલે પોસ્ટમાં લખ્યું હતું, `પિન્ક સિટી, બ્લૂ રિઝલ્ટ. ખમ્મા ઘણી.' આવું લખ્યા બાદ ગિલે `માફ કરજો' એવા અર્થવાળું ઇમોજી જોડ્યું હતું. શુભમન ગિલે આ વખતે ચોથી વખત હાફ સેન્ચુરી ફટકારી છે. ગુજરાતની ટીમ આ જીત બાદ પૉઇન્ટ્સમાં બીજા નંબર પર આવી ગઈ હતી.
રાજસ્થાનમાં `ખમ્મા ઘણી'નો `ભૂલ થઈ' એવો મૂળ અર્થ થાય. એ રીતે આ પોસ્ટમાં શુભમન ગિલ તેમ જ મૅન ઑફ ધ મૅચ રાશીદ ખાને રાજસ્થાન રૉયલ્સના ખેલાડીઓને હરાવ્યા પછી હળવી મજાક કરતા `અમારાથી ભૂલ થઈ' એવા અર્થમાં `ખમ્મા ઘણી' કહ્યું હશે. જોકે આ ટૂંકી કહેવતનો બીજી રીતે `સ્વાગત' અને `શુભેચ્છા' પણ અર્થ થાય છે.
