અમદાવાદઃ ગુજરાત સરકારે વધુ એક મોટો નિર્ણય લીધો હતો. રાજ્ય સરકારે અમદાવાદ, સુરત, નવસારીની 5 ટાઉન પ્લાનિંગ (TP) સ્કીમમાં ફેરફારોને મંજૂરી આપી હતી. જેમાં અર્બન ફોરેસ્ટ, પાર્કિંગ અને સોશિયલ ઈન્ફ્રાસ્ટ્રક્ચર માટે અનેક જમીન પ્લોટ અનામત રાખવામાં આવ્યા છે.
અમદાવાદમાં ક્યાં અપાઈ મંજૂરી
અમદાવાદમાં આ ફેરફારો એરપોર્ટ નજીકના હાંસોલ તેમજ નિકોલ અને ઓઢવ ઔદ્યોગિક વિસ્તાર નજીકના સિંગરવાને આવરી લે છે. આ સુધારાઓમાં રસ્તા પહોળા કરવા અને સીધા કરવા, પાર્કિંગની નવી જોગવાઈઓ અને વધારાની ગ્રીન સ્પેસનો સમાવેશ થાય છે.
પ્રિલિમિનરી ટીપી સ્કીમ નં. 67 (હાંસોલ-1) હેઠળ, 16,616 ચોરસ મીટરનો પ્લોટ અર્બન ફોરેસ્ટ માટે અનામત રાખવામાં આવ્યો છે. ઘણા રસ્તાઓ પહોળા અથવા સીધા કરવામાં આવશે, જ્યારે 7 મીટરનો નવો રસ્તો સૂચવવામાં આવ્યો છે. બિનજરૂરી ગણાતા હાલના 9 મીટરના ચાર રસ્તાઓ આ પ્લાનમાંથી દૂર કરવામાં આવ્યા છે.
અન્ય સાત પ્લોટ સોશિયલ ઈન્ફ્રાસ્ટ્રક્ચર માટે નોન-ટ્રાન્સફરેબલ પાર્કિંગ પ્લોટ તરીકે રાખવામાં આવ્યા છે. હાલના બાંધકામો ધરાવતા મિલકત માલિકોએ જ્યારે તેમની મિલકતોનું રિડેવલપમેન્ટ થશે ત્યારે જમીનનો નિર્ધારિત હિસ્સો સત્તામંડળને સોંપવો પડશે.
ટીપી સ્કીમ નં. 118 (સિંગરવા) હેઠળ, 2148 ચોરસ મીટર અને 770 ચોરસ મીટરના બે ઓપન-સ્પેસ પ્લોટને અર્બન ફોરેસ્ટની જમીનમાં ફેરવવામાં આવ્યા છે. આ ઉપરાંત ત્રણ કોમર્શિયલ પ્લોટનું જોડાણ કરીને 11,637 ચોરસ મીટરનો સિંગલ કોમર્શિયલ વેચાણ પ્લોટ તૈયાર કરવામાં આવ્યો છે, જ્યારે અન્ય પ્લોટ્સ સામાજિક સુવિધાઓ સાથે જોડાયેલા પાર્કિંગ માટે રિઝર્વ રખાયા છે.
આ ફેરફારોનો મુખ્ય ઉદ્દેશ્ય અમદાવાદના વિસ્તરતા શહેરી વિસ્તારોમાં રિડેવલપમેન્ટ અને રોડ ઈન્ફ્રાસ્ટ્રક્ચરની સાથે ગ્રીન સ્પેસ, પાર્કિંગ અને સામાજિક સુવિધાઓની જરૂરિયાત વચ્ચે સંતુલન જાળવવાનો છે.
