તહેરાનઃ અમેરિકાના પ્રમુખ ડોનાલ્ડ ટ્રમ્પે એક પોસ્ટમાં ભારત અને ચીનને નરકના ખાડા તરીકે ઓળખાવ્યા બાદ ઇરાન બંને એશિયન દેશોના બચાવમાં ઉતર્યું છે. ઇરાને ભારત અને ચીનને 'સંસ્કૃતિના પારણા' કહ્યા છે.
હૈદરાબાદમાં ઇરાની દૂતાવાસે એક્સ પર જણાવ્યું કે ચીન અને ભારત 'સંસ્કૃતિના પારણા' છે. ખરેખર નરકનો ખાડો એ છે જ્યાં યુદ્ધ-અપરાધી પ્રમુખ ઇરાની સંસ્કૃતિને નાશ કરવાની ધમકી આપે છે.
આ એ ઘટનાના સંદર્ભમાં હતું જ્યારે ટ્રમ્પે ચેતવણી આપી હતી કે જો ઇરાન યુદ્ધ(જે અમેરિકાએ શરૂ કર્યું હતું) સમાપ્ત કરવા અને હોર્મુઝની ખાડીને ફરીથી ખોલવા માટે તેમની શરતો સાથે સહમત નહીં થાય તો આજે રાત્રે આખી સભ્યતાનો અંત આવશે. ટ્રમ્પે આ ટિપ્પણી તેહરાન માટે નક્કી કરાયેલી સમયમર્યાદાની ઠીક પહેલા કરી હતી.
ટ્રમ્પ દ્વારા માઇકલ સેવેજ દ્વારા આયોજિત એક કન્ઝર્વેટિવ ટોક શોની ટ્રાન્સક્રિપ્ટ પોસ્ટ કર્યા બાદ ઇરાનની તાજેતરની પ્રતિક્રિયા આવી હતી. આ શોમાં સેવેજે અમેરિકાની 'જન્મસિદ્ધ નાગરિકતા' વિશે વાત કરી હતી.
સેવેજે કહ્યું કે લોકો ગર્ભાવસ્થાના અંતના સમયમાં અમેરિકા આવે છે અને તેમના બાળકો માટે નાગરિકતા મેળવે છે. પછી તેઓ ભારત અને ચીન જેવા દેશોમાંથી તેમના પરિવારના અન્ય સભ્યોને પણ અમેરિકા બોલાવી લે છે. તેમણે આ દેશોને પૃથ્વી પર અન્ય નરક જેવી જગ્યા કહીને સંબોધિત કર્યા હતા.
