અમદાવાદ: ગુજરાતના ઓટો રિક્ષા ચાલકોને લગતા ફ્લેગ મીટરના મુદ્દે પરિવહન વિભાગ અને પોલીસ તંત્રની કામગીરી સામે ગંભીર કાનૂની સવાલો ઉઠાવતી સ્પેશિયલ સિવિલ એપ્લિકેશન ગુજરાત હાઈકોર્ટ સમક્ષ રજૂ કરવામાં આવી છે. જાગૃત ઓટો રિક્ષા ડ્રાઇવર્સ યુનિયન દ્વારા દાખલ કરવામાં આવેલી આ પિટિશનમાં કથિત ભેદભાવ, સત્તાના દુરુપયોગ, મનસ્વી અમલવારી અને ભ્રષ્ટાચાર અંગે ગંભીર આક્ષેપો કરવામાં આવ્યા છે.

આ પિટિશન મુજબ, ગુજરાતમાં વર્ષ 2005માં મીટર સંબંધિત નિયમો રદ થયા બાદ ઓટો રિક્ષામાં અલગ ટેક્સી ફ્લેગ મીટર ફરજિયાત હોવા અંગે કોઈ સ્પષ્ટ અને ચાલુ કાનૂની જોગવાઈ, નિયમ કે સરકારી નોટિફિકેશન હોવાનો દાવો નથી. તેમ છતાં વર્ષ 2014, 2016 અને 2022માં પરિવહન વિભાગ દ્વારા મીટર લગાવવાની અમલવારી સંબંધિત આદેશો કરવામાં આવ્યા હોવાનું પિટિશનમાં જણાવાયું છે.

મહત્વપૂર્ણ સવાલ ભેદભાવપૂર્ણ અમલવારીનો

આ પિટિશનમાં સૌથી મહત્વપૂર્ણ સવાલ ભેદભાવપૂર્ણ અમલવારીનો ઉઠાવવામાં આવ્યો છે. અરજદારનો દાવો છે કે જો સંબંધિત કાયદાની જોગવાઈ હેઠળ અંતર માપવાના મીટરને લઈને કાર્યવાહી કરવી હોય, તો સમાન પ્રકારના અન્ય પરિવહન વાહનો માટે પણ કાયદાનો સમાન ધોરણે અમલ થવો જોઈએ.

સમાનતાના સિદ્ધાંતનો કાનૂની મુદ્દો ઉઠાવવામાં આવ્યો

પિટિશનમાં આ પ્રકારની પસંદગીયુક્ત કાર્યવાહી બંધારણના Article 14 હેઠળના સમાનતાના સિદ્ધાંતનો કાનૂની મુદ્દો ઉઠાવવામાં આવ્યો છે.અરજદાર પક્ષનો આરોપ છે કે વહીવટી આદેશ દ્વારા એવી ફરજ ઊભી કરી શકાતી નથી જેનો સ્પષ્ટ કાનૂની આધાર ઉપલબ્ધ ન હોય. 

ઓટો રિક્ષા ચાલકો સામે ચલણ અને દંડની કાર્યવાહી 

પિટિશનમાં એવો દાવો કરવામાં આવ્યો છે કે ફ્લેગ મીટર ન હોવા અથવા કામ ન કરતા હોવાના આધારે ઓટો રિક્ષા ચાલકો સામે ચલણ અને દંડની કાર્યવાહી કરવામાં આવી છે, જેને અરજદાર પક્ષે સત્તાનો દુરુપયોગ અને કાયદાકીય અધિકાર વિના કરવામાં આવેલી કાર્યવાહી તરીકે પડકારી છે.

ખાસ કરીને 14 નવેમ્બર 2025ના રોજ એક ઓટો રિક્ષા ચાલકને બિનકાર્યરત ફ્લેગ મીટરના આરોપસર ₹500નું ઈ-ચલણ આપવામાં આવ્યું હોવાનો ઉલ્લેખ પિટિશનમાં છે.આ સમગ્ર મામલામાં સૌથી ગંભીર મુદ્દો કથિત ભ્રષ્ટાચાર અને ખાનગી મીટર ઉત્પાદક કંપનીઓને ગેરકાયદેસર આર્થિક લાભ પહોંચાડવાના આક્ષેપોનો છે.

ચોક્કસ ખાનગી મીટર ઉત્પાદક કંપનીઓને અનુચિત લાભ

પિટિશનમાં એવો આક્ષેપ કરવામાં આવ્યો છે કે ફરજિયાત મીટરની અમલવારીથી ચોક્કસ ખાનગી મીટર ઉત્પાદક કંપનીઓને અનુચિત લાભ મળ્યો હોઈ શકે છે અને આ વ્યવસ્થામાં કરોડો રૂપિયાના સંભવિત આર્થિક લાભ અંગે તપાસ જરૂરી છે. અરજદાર પક્ષે આ સમગ્ર બાબતની નિષ્પક્ષ તપાસ કરીને જવાબદાર વ્યક્તિઓ સામે કાયદેસરની કાર્યવાહી કરવાની માંગ કરી છે. આ આક્ષેપોની સત્યતા અંગે અંતિમ નિર્ણય સક્ષમ તપાસ એજન્સી અથવા અદાલત દ્વારા જ થવાનો રહેશે.

રજૂઆતો છતાં કાર્યવાહી ન થવાનો પણ આક્ષેપ

પિટિશનમાં જણાવ્યા મુજબ, યુનિયન દ્વારા 31 મે 2025ના રોજ અમદાવાદ પોલીસ કમિશનર સહિત સંબંધિત સત્તાધિકારીઓને રજૂઆત કરવામાં આવી હતી. ત્યારબાદ 23 જૂન 2025ના રોજ ગુજરાતના મુખ્યમંત્રી અને એન્ટી કરપ્શન બ્યુરો સમક્ષ પણ કથિત ભ્રષ્ટાચાર અંગે રજૂઆત કરવામાં આવી હોવાનું જણાવાયું છે.

ઓટો રિક્ષા ચાલકોને આર્થિક નુકસાન, હેરાનગતિ 

પિટિશનમાં એવો દાવો કરવામાં આવ્યો છે કે મીટર સંબંધિત ફરજિયાત અમલવારી, દંડ અને કાર્યવાહીથી રાજ્યના ઓટો રિક્ષા ચાલકોને આર્થિક નુકસાન, હેરાનગતિ અને અપમાનનો સામનો કરવો પડ્યો છે. 

હાઈકોર્ટ સમક્ષ મહત્વપૂર્ણ માંગણીઓ

પિટિશન દ્વારા ગુજરાત હાઈકોર્ટ સમક્ષ 2014, 2016 અને 2022ના સંબંધિત પરિવહન વિભાગના આદેશો તથા 5 ડિસેમ્બર 2024ના અમદાવાદ પોલીસ કમિશનરના આદેશને રદ કરવાની માંગ કરવામાં આવી છે. સાથે જ ફ્લેગ મીટર વગર ઓટો રિક્ષાના પરમિટ અને ફિટનેસ સર્ટિફિકેટ અંગે તથા અગાઉના ચલણો રદ કરવા અંગે પણ દિશાનિર્દેશની માંગ કરવામાં આવી છે.

 કાયદા અનુસાર યોગ્ય કાર્યવાહી કરવાની માંગ

આ મામલો માત્ર મીટરનો પ્રશ્ન નથી, પરંતુ કાયદાનો સમાન અમલ, વહીવટી સત્તાની મર્યાદા, પારદર્શિતા અને લાખો પરિવહન કામદારોના અધિકારો સાથે જોડાયેલો મહત્વપૂર્ણ મુદ્દો હોવાનું અરજદાર પક્ષનું કહેવું છે.યુનિયન દ્વારા સમગ્ર મામલામાં પારદર્શક અને નિષ્પક્ષ તપાસ, જવાબદારી નક્કી કરવા તથા કાયદા અનુસાર યોગ્ય કાર્યવાહી કરવાની માંગ કરવામાં આવી છે.