નિલેશ વાઘેલા
મુંબઇ: અમેરિકાના ઇન્ફ્લેશન ડેટાની જાહેરાત પહેલાના સાવચેતીના માનસ વચ્ચે ગ્લોબલ માર્કેટમાંથી મળી રહેલા નબળાઇના સંકેત સાથે એઆઇના વિક્ષેપના ભય વચ્ચે ડહોળાયેલા માનસને કારણે વધેલા વેચવાલીના દબાણમાં સેન્સેક્સમાં ૧,૦૪૮ પોઈન્ટનો જોરદાર કડાકો નોંધાયો હતો. જ્યારે, નિફ્ટી ૨૫,૫૦૦ની નીચે સરકી ગયો હતો.

બીએસઈ સેન્સેક્સ ૧,૦૪૮ પોઈન્ટ ઘટીને ૧.૨૫ ટકા ઘટીને ૮૨,૬૨૭ પોઇન્ટની સપાટી પર બંધ થયો હતો, જ્યારે નિફ્ટી ૫૦ ૩૩૬ પોઈન્ટ ઘટીને ૨૫,૫૦૦ના સ્તરથી નીચે સરકીને ૨૫,૪૭૧ પર બંધ થયો હતો. એક અંદાજ અનુસાર રોકાણકારોની સંપત્તિમાંથી લગભગ રૂ. ૭.૪૦ લાખ કરોડનું ધોવાણ થયું છે.

શુક્રવારે બેન્ચમાર્ક ઇન્ડેક્સ સેન્સેક્સ અને નિફ્ટી એકાદ ટકાથી વધુ તૂટ્યા હતા, જે સતત બીજા સત્રમાં ઘટાડો દર્શાવે છે કારણ કે આઇટી શેરોમાં વધતી જતી વેચવાલીથી એઆઇને કારણે શરૂ થયેલા વિક્ષેપના વધતા ભય વચ્ચે રોકાણકારોના સેન્ટિમેન્ટમાં ખલેલ પહોંચ્યો હતો. આ ઘટાડો ૧૩મી તારીખે શુક્રવારે પણ આવ્યો હતો, જે તારીખ ખાસ કરીને પશ્ર્ચિમના દેશોમાં લાંબા સમયથી કમનસીબ માનવામાં આવે છે.

બજારોમાં વ્યાપક વેચવાલી જોવા મળી હતી, જેમાં તમામ સેકટરલ ઇન્ડેક્સ રેડ ઝોનમાં ગબડી ગયા હતા. ટેકનોલોજી શેરોમાં વિશેષ ઘટાડો થયો હતો, જેના કારણે સેન્ટિમેન્ટ વધુને વધુ ખરડાતું ગયું હતું. જ્યારે મેટલ્સ, રિયલ્ટી અને મીડિયા સેકટરના શેરોએ પણ વેચવાલીના તીવ્ર દબાણનો સામનો કરવો પડ્યો હતો.

ડિફેન્સિવ સેકટર્સે સંબંધિત સ્થિતિસ્થાપકતા દર્શાવી હતી, પરંતુ નબળાઈને સરભર કરવામાં નિષ્ફળ રહ્યાં હતા, જે રોકાણકારોમાં સાવચેતીનો મૂડ દર્શાવે છે.
ઇન્ડેક્સ હેવીવેઇટ હિંદુસ્તાન યુનીલીવર, ઇટર્નલ, ટાટા સ્ટીલ, ટાઇટન, અદાણી પોર્ટ અને રિલાયન્સ જેવા શેરોમાં ૪.૫૦ ટકા સુધીનો કડાકો નોંધાયો હતો.

આઇટી પેકમાંથી, ઇન્ફોસિસ, ટીસીએસ, એચસીએલ ટેક અને વિપ્રોમાં સૌથી વધુ ધોવાણ જોવા મળ્યું હતું, જોકે તે નીચા સ્તરેથી ઝડપથી પાછાં પણ ફર્યા હતા. આ ભારે ઘટાડાથી રોકાણકારોની સંપત્તિમાં લગભગ રૂ. ૭.૪ લાખ કરોડનો ઘટાડો થયો હતો, જેના કારણે બીએસઇનું કુલ બજાર મૂડીકરણ લગભગ રૂ. ૪૬૫ લાખ કરોડ થયું હતું.

શેરબજારના ધબડકાના મુખ્ય કારણો:-
૧.) આઇટી શેરોમં તીવ્ર વેચવાલી
૨.) ગ્લોબલ ઇક્વિટી બજારના નબળા સંકેત
૩.) ડોલરની મજબૂતાઈ, રૂપિયાની નબળાઇ
૪.) સતત વધી રહેલો ભૂ-રાજકીય તણાવ